ശബരിമല ശ്രീ ധർമ്മശാസ്താ ക്ഷേത്രത്തിലെ ദോഷങ്ങളും അുഷ്ഠാനപരമായ തടസ്സങ്ങളും നീക്കുന്നതിനായി തിരുവിതാംകൂർ ദേവസ്വം ബോർഡിന്റെ നേതൃത്വത്തിൽ കർണാടകയിലെ പ്രശസ്തമായ കൊല്ലൂർ മൂകാംബികാ ക്ഷേത്രത്തിൽ പ്രത്യേക പരിഹാരക്രിയകൾ ആരംഭിച്ചു. തിരുവിതാംകൂർ ദേവസ്വം ബോർഡ് പ്രസിഡന്റ് പി.എസ്. പ്രശാന്ത്, ബോർഡ് അംഗം എ. അജികുമാർ എന്നിവരുടെ നേതൃത്വത്തിലാണ് ചടങ്ങുകൾ നടത്തിയത്.
ശബരിമലയിലെ ദേവപ്രശ്ന വിധിപ്രകാരമുള്ള പരിഹാരക്രിയകളുടെ ഭാഗമായാണ് കർണാടകയിലെ ഈ പ്രധാന ശക്തിപീഠത്തിൽ പ്രത്യേക പൂജകൾ സംഘടിപ്പിച്ചത്. ക്ഷേത്രത്തിൽ വന്നുവീണിട്ടുള്ള വിവിധ ദോഷങ്ങൾ അകറ്റുന്നതിനും അയ്യപ്പന്റെ അനുഗ്രഹം പൂർണ്ണമായി ലഭ്യമാക്കുന്നതിനും ലക്ഷ്യമിട്ടാണ് പ്രസാദസൂക്ത ഹോമം, പഞ്ചാമൃതാഭിഷേകം തുടങ്ങിയ പ്രധാന വഴിപാടുകളും പ്രത്യേക പൂജകളും നടത്തിയത്.
ക്ഷേത്ര ആചാരങ്ങൾ കൃത്യതയോടെ പാലിക്കുന്നതിലും ക്ഷേത്രത്തിന്റെ പവിത്രത കാത്തുസൂക്ഷിക്കുന്നതിലും ദേവസ്വം ബോർഡിന്റെ ഭാഗത്തുനിന്നുള്ള ജാഗ്രതയുടെ ഭാഗമായാണ് ഈ നിർണായക നടപടി. കഴിഞ്ഞകാലങ്ങളിൽ ശബരിമലയുമായി ബന്ധപ്പെട്ട് ദർശിക്കപ്പെട്ട വിവിധ പ്രശ്നങ്ങളും അസന്തുലിതാവസ്ഥകളും പരിഹരിക്കാൻ ഇത്തരം തന്ത്രിമുഖ്യന്മാരുടെ നിർദ്ദേശപ്രകാരമുള്ള പരിഹാരക്രിയകൾ അനിവാര്യമാണെന്ന് ബോർഡ് വിലയിരുത്തിയിരുന്നു.
പ്രസിഡന്റ് പി.എസ്. പ്രശാന്ത്, അംഗം എ. അജികുമാർ എന്നിവർക്കൊപ്പം ദേവസ്വം ബോർഡിലെ മറ്റ് ഉന്നത ഉദ്യോഗസ്ഥരും ചടങ്ങുകളിൽ സന്നിഹിതരായിരുന്നു. ചടങ്ങുകൾ പൂർത്തിയായതോടെ വരും ദിവസങ്ങളിൽ ശബരിമലയിലും അനുബന്ധ ക്ഷേത്രങ്ങളിലും കൂടുതൽ ശുദ്ധിക്രിയകളും വിശേഷാൽ പൂജകളും നടപ്പിലാക്കാൻ ദേവസ്വം ബോർഡിന് പദ്ധതിയുണ്ട്. ഈ നടപടികൾ ശബരിമലയുടെ ആത്മീയ ചൈതന്യം വർദ്ധിപ്പിക്കുമെന്നും ഭക്തർക്ക് കൂടുതൽ മെച്ചപ്പെട്ട രീതിയിൽ ദർശനം സാധ്യമാക്കാൻ സഹായിക്കുമെന്നുമാണ് ദേവസ്വം ബോർഡിന്റെ പ്രതീക്ഷ.
