ഇന്ത്യൻ ക്രിക്കറ്റ് കൺട്രോൾ ബോർഡിൽ (ബിസിസിഐ) നിർണായക മാറ്റങ്ങൾക്ക് വഴിയൊരുങ്ങുന്നു. നിലവിലെ ചീഫ് സെലക്ടറായ അജിത് അഗാർക്കറുടെ കാലാവധി അവസാനിക്കുന്നതോടെ പുതിയ സിലക്ഷൻ സമിതി അധ്യക്ഷനെക്കുറിച്ചുള്ള ചർച്ചകൾ സജീവമായി. മുൻ ഇന്ത്യൻ താരം ആർ. അശ്വിൻ പുതിയ ചീഫ് സെലക്ടറായേക്കുമെന്ന റിപ്പോർട്ടുകളാണ് ഇപ്പോൾ പുറത്തുവരുന്നത്.
2023 ജൂലൈയിൽ ചുമതലയേറ്റ അജിത് അഗാർക്കറുടെ കീഴിൽ ഇന്ത്യൻ ടീം ഐസിസി ടൂർണമെന്റുകളിൽ വലിയ വിജയങ്ങളാണ് സ്വന്തമാക്കിയത്. അദ്ദേഹത്തിന്റെ കാലയളവിൽ ഇന്ത്യ 2024-ലെ ട്വന്റി20 ലോകകപ്പും 2025-ലെ ചാമ്പ്യൻസ് ട്രോഫിയുമടക്കം നിരവധി കിരീടങ്ങൾ നേടി. സയന്റിഫിക്കായായ ടീം തിരഞ്ഞെടുപ്പും യുവതാരങ്ങൾക്ക് അവസരം നൽകിയതും അഗാർക്കറുടെ ഭരണനേട്ടങ്ങളായി വിലയിരുത്തപ്പെടുന്നു.
എങ്കിലും, വരാനിരിക്കുന്ന നിർണായക ടൂർണമെന്റുകളും ബിസിസിഐയുടെ പുതിയ ചട്ടക്കൂടുകളും മുൻനിർത്തി സിലക്ഷൻ കമ്മിറ്റിയിൽ ഉടൻ തന്നെ അഴിച്ചുപണി ഉണ്ടായേക്കുമെന്നാണ് സൂചന. ഇതിൽ മുൻ ഇന്ത്യൻ പ്രമുഖ ഓഫ് സ്പിന്നറായ ആർ. അശ്വിന്റെ പേര് ചീഫ് സെലക്ടർ സ്ഥാനത്തേക്ക് സജീവമായി പരിഗണിക്കപ്പെടുന്നുണ്ട്. അന്താരാഷ്ട്ര ക്രിക്കറ്റിലെ അപാരമായ അനുഭവസമ്പത്തും തന്ത്രപരമായ കാഴ്ചപ്പാടുകളും അശ്വിനെ ഈ പദവിക്ക് ഏറ്റവും അനുയോജ്യനാക്കുന്നുവെന്നാണ് ക്രിക്കറ്റ് നിരീക്ഷകർ വിലയിരുത്തുന്നത്.
ഇന്ത്യൻ ക്രിക്കറ്റിന്റെ ഭാവി രൂപപ്പെടുത്തുന്നതിൽ സിലക്ഷൻ കമ്മിറ്റിയുടെ പങ്ക് വളരെ വലുതാണ്. 2027-ലെ ഏകദിന ലോകകപ്പ് ലക്ഷ്യമിട്ട് ടീമിനെ ഒരുക്കുന്നതിൽ ബിസിസിഐയുടെ അടുത്ത നീക്കം നിർണ്ണായകമാകും. ഔദ്യോഗിക പ്രഖ്യാപനങ്ങൾ വരുന്നതോടെ ഇന്ത്യൻ ക്രിക്കറ്റ് സെലക്ഷൻ ബോർഡിൽ വലിയൊരു നേതൃമാറ്റത്തിന് കളമൊരുങ്ങുമെന്നുറപ്പാണ്.
