ആലപ്പുഴയിലെ വിവാദമായ ‘രക്ഷാപ്രവർത്തന’ കേസ് അട്ടിമറിക്കാൻ മുൻ ക്രമസമാധാന ചുമതലയുണ്ടായിരുന്ന എഡിജിപി എം.ആർ. അജിത് കുമാർ നേരിട്ട് ഇടപെട്ടതായി പ്രത്യേക അന്വേഷണ സംഘത്തിന്റെ (SIT) കണ്ടെത്തൽ. കേസ് ഡയറിയിൽ തിരുത്തലുകൾ വരുത്തുകയും നിർണായക തെളിവുകൾ നശിപ്പിക്കുകയും ചെയ്തതിലൂടെ ഔദ്യോഗിക പദവി ദുരുപയോഗം ചെയ്തുവെന്ന് അന്വേഷണ റിപ്പോർട്ട് വ്യക്തമാക്കുന്നു. ഇതിന്റെ അടിസ്ഥാനത്തിൽ അജിത് കുമാറിനെതിരെ കർശനമായ വകുപ്പുതല നടപടികൾക്ക് ആഭ്യന്തരവകുപ്പ് നീക്കം തുടങ്ങി.
മുൻ മുഖ്യമന്ത്രി പിണറായി വിജയന്റെ നവകേരള യാത്രയ്ക്കിടെ യൂത്ത് കോൺഗ്രസ് പ്രവർത്തകർക്ക് നേരെ നടന്ന ആക്രമണത്തെ ‘രക്ഷാപ്രവർത്തനം’ എന്ന് വിശേഷിപ്പിച്ചത് വലിയ രാഷ്ട്രീയ വിവാദമായിരുന്നു. ഈ കേസിൽ പ്രതികളായ സുരക്ഷാ ഉദ്യോഗസ്ഥരെ രക്ഷിക്കാൻ അജിത് കുമാർ ആസൂത്രിതമായ ശ്രമം നടത്തിയെന്നാണ് എസ്.ഐ.ടിയുടെ റിപ്പോർട്ട്. അന്വേഷണ ഉദ്യോഗസ്ഥരെ തന്റെ ഓഫീസിലേക്ക് വിളിച്ചുവരുത്തി കേസ് ഡയറിയിൽ തിരുത്തലുകൾ വരുത്താൻ സമ്മർദം ചെലുത്തിയതായും, ഇതിനായി രണ്ട് ഗ്രേഡ് എസ്.ഐമാരെ ഉപയോഗിച്ചതായും അന്വേഷണത്തിൽ തെളിഞ്ഞു.
ഈ ഗ്രേഡ് എസ്.ഐമാർ നൽകിയ മൊഴികളും, ഓഫീസിലെ സി.സി.ടി.വി ദൃശ്യങ്ങളും, കമ്പ്യൂട്ടർ രേഖകളുടെ ഫോറൻസിക് പരിശോധനയും അജിത് കുമാറിനെതിരായ കുറ്റങ്ങൾ ഉറപ്പിക്കുന്നു. കേസിൽ നടപടിയെടുക്കുന്നതിന് മുൻപ് ഡിജിപി നിയമോപദേശം തേടിയിട്ടുണ്ട്. അജിത് കുമാറിൽ നിന്ന് വിശദീകരണം തേടിയ ശേഷം സസ്പെൻഷൻ ഉൾപ്പെടെയുള്ള നടപടികളിലേക്ക് കടക്കാനാണ് സർക്കാർ ആലോചിക്കുന്നത്.
ഈ മാസം അവസാനം നടക്കാനിരിക്കുന്ന സ്ഥാനക്കയറ്റ പട്ടികയിൽ അജിത് കുമാറിന്റെ പേരും പരിഗണനയിലുണ്ട്. എന്നാൽ, അന്വേഷണ റിപ്പോർട്ടും തുടർന്നുള്ള നിയമനടപടികളും അദ്ദേഹത്തിന്റെ ഔദ്യോഗിക ഭാവിക്ക് വലിയ തിരിച്ചടിയായി മാറിയേക്കും. കേസിൽ ഉൾപ്പെട്ട മറ്റ് ഉദ്യോഗസ്ഥർക്കെതിരെയും നടപടി ഉറപ്പാണ്.
