വ്യാജ രേഖകൾ ചമച്ച് സംസ്ഥാനത്ത് നടന്നുവന്ന അവയവക്കച്ചവടത്തിൽ എൻഫോഴ്സ്മെന്റ് ഡയറക്ടറേറ്റ് (ഇ.ഡി.) അന്വേഷണം കൂടുതൽ കർശനമാക്കുന്നു. കൊച്ചിയിലെ പ്രമുഖ സ്വകാര്യ ആശുപത്രിയായ ലേക്ഷോറിലെ മാനേജ്മെന്റ് പ്രതിനിധികളെ നേരത്തെ ചോദ്യം ചെയ്തിരുന്നു. ഇതിനു പിന്നാലെയാണ്, ആശുപത്രിയിലെ മുതിർന്ന ഡോക്ടർമാർ ഉൾപ്പെടെയുള്ളവരിലേക്ക് അന്വേഷണ സംഘം ശ്രദ്ധ കേന്ദ്രീകരിക്കുന്നത്.
സാമ്പത്തികമായി പിന്നാക്കം നിൽക്കുന്നവരെ പ്രലോഭിപ്പിച്ച് അവയവദാനത്തിന് നിർബന്ധിതരാക്കുകയും, ഈ അവയവങ്ങൾ വൻ തുകയ്ക്ക് അത്യാവശ്യക്കാർക്ക് മറിച്ചുവിൽക്കുകയുമായിരുന്നു റാക്കറ്റിന്റെ രീതി. ഈ നിയമവിരുദ്ധ ശസ്ത്രക്രിയകളിൽ ആശുപത്രി അധികൃതർക്കും ഡോക്ടർമാർക്കും വലിയ തോതിൽ സാമ്പത്തിക നേട്ടം ലഭിച്ചിട്ടുണ്ടോ എന്ന് ഇ.ഡി. പരിശോധിക്കുന്നുണ്ട്. ആശുപത്രിയുടെ പ്രവർത്തനങ്ങളിൽ നിന്ന് ലഭിച്ച രേഖകളും സാമ്പത്തിക ഇടപാടുകളും തമ്മിൽ പൊരുത്തക്കേടുകൾ ഉണ്ടോയെന്നതാണ് പ്രധാനമായും പരിശോധിക്കുന്നത്.
അവയവക്കച്ചവടത്തിൽ ഉൾപ്പെട്ട മുഖ്യപ്രതികളുമായി ചേർന്ന് പ്രവർത്തിച്ച ആശുപത്രികൾ വലിയ തോതിൽ സാമ്പത്തിക നേട്ടമുണ്ടാക്കിയതായാണ് ഇ.ഡിയുടെ പ്രാഥമിക നിഗമനം. ഇതിന്റെ ഭാഗമായി ലേക്ഷോർ ഉൾപ്പെടെയുള്ള ആശുപത്രികളിലെ കഴിഞ്ഞ അഞ്ചുവർഷത്തെ സാമ്പത്തിക വിവരങ്ങളും ബാങ്ക് അക്കൗണ്ട് രേഖകളും ഹാജരാക്കാൻ മുതിർന്ന ഡോക്ടർമാർക്ക് നിർദേശം നൽകിയിട്ടുണ്ട്. ശസ്ത്രക്രിയയ്ക്ക് അനുമതി ലഭിക്കുന്നതിനായി വ്യാജ രേഖകളും ഒപ്പിട്ട ലെറ്റർഹെഡുകളും ഉപയോഗിച്ചതായി അന്വേഷണത്തിൽ വ്യക്തമായിട്ടുണ്ട്.
കഴിഞ്ഞ ജൂണിൽ സംസ്ഥാനത്തെ വിവിധ സ്വകാര്യ ആശുപത്രികളിൽ ഇ.ഡി. നടത്തിയ റെയ്ഡുകൾക്ക് ശേഷമാണ് അന്വേഷണം നിർണായക ഘട്ടത്തിലേക്ക് കടന്നത്. ആശുപത്രി മാനേജ്മെന്റും ട്രാൻസ്പ്ലാൻറ് കോർഡിനേറ്റർമാരും ഈ റാക്കറ്റുമായി ഗൂഢാലോചന നടത്തിയിട്ടുണ്ടോയെന്നതിലാണ് ഇപ്പോൾ അന്വേഷണം നടക്കുന്നത്. ഡോക്ടർമാരുടെ മൊഴികൾ കൂടി രേഖപ്പെടുത്തിയ ശേഷം കൂടുതൽ പേർക്കെതിരെ നടപടിയുണ്ടാകുമെന്നാണ് സൂചന. അവയവദാന നിയമങ്ങളെ അട്ടിമറിച്ചുള്ള ഈ നടപടികൾ ആരോഗ്യമേഖലയിൽ വലിയ ആശങ്കയാണ് ഉയർത്തുന്നത്.
