മലപ്പുറം: ചങ്ങരംകുളത്ത് കളിക്കുന്നതിനിടെ ചെറിയ കല്ല് തൊണ്ടയിൽ കുടുങ്ങി ഒരു വയസ്സുകാരന് ദാരുണാന്ത്യം. പള്ളിക്കര തെക്കുമുറി കൊയ്യാംകോട്ടിൽ മഹ്റൂഫ്-റുമാന ദമ്പതികളുടെ മകൻ അസ്ലം നൂഹ് ആണ് മരിച്ചത്. ഞായറാഴ്ച രാവിലെ വീടിന് പുറത്ത് മണ്ണിൽ കളിച്ചുകൊണ്ടിരിക്കെ അബദ്ധത്തിൽ കല്ല് വിഴുങ്ങിയതാണ് അപകടത്തിന് കാരണമായത്.
രാവിലെ വീട്ടുമുറ്റത്ത് കളിക്കുകയായിരുന്ന കുട്ടി മണ്ണ് വാരി വായിലിടുന്നതിനിടെ അതിലുണ്ടായിരുന്ന കല്ല് തൊണ്ടയിൽ കുടുങ്ങുകയായിരുന്നു. കുട്ടിക്ക് ശ്വാസതടസ്സം അനുഭവപ്പെട്ടതോടെ വീട്ടുകാർ ഉടൻ തന്നെ ചങ്ങരംകുളത്തെ സ്വകാര്യ ആശുപത്രിയിൽ എത്തിച്ചു. പിന്നീട് വിദഗ്ദ്ധ ചികിത്സയ്ക്കായി കോട്ടക്കലിലെ സ്വകാര്യ ആശുപത്രിയിലേക്ക് മാറ്റിയെങ്കിലും രാത്രിയോടെ മരണം സംഭവിക്കുകയായിരുന്നു.
കുഞ്ഞിന്റെ അപ്രതീക്ഷിത മരണം പള്ളിക്കര ഗ്രാമത്തെ ഒന്നടങ്കം ദുഃഖത്തിലാഴ്ത്തി. ഖബറടക്കം ഇന്ന് രാവിലെ പള്ളിക്കര ജുമാ മസ്ജിദ് ഖബർസ്ഥാനിൽ നടന്നു. ഹെസ മറിയം ആണ് പരേതനായ അസ്ലമിന്റെ ഏക സഹോദരി. പിഞ്ചുകുട്ടികൾ കളിക്കുമ്പോൾ മാതാപിതാക്കൾ അതീവ ജാഗ്രത പാലിക്കണമെന്ന് ഈ ദാരുണ സംഭവം ഒരിക്കൽ കൂടി ഓർമ്മിപ്പിക്കുന്നു
