കണ്ണൂരിലെ ഒരു റേഷൻ കടയിൽ കയറിയ തെരുവുനായയെ ധൈര്യത്തോടെ നേരിട്ട് കീഴ്പ്പെടുത്തിയ റേഷൻ കട ജീവനക്കാരി വിജിന താരമായി. കടയിൽ സാധനങ്ങൾ വാങ്ങാൻ എത്തിയ ആളുകൾ പരിഭ്രാന്തരായി ഓടിമാറിയപ്പോൾ, നായയെ നേരിടാൻ വിജിന ഒറ്റയ്ക്ക് മുന്നിട്ടിറങ്ങി. “നായ കടിക്കാൻ വന്നു. ഞാൻ കഴുത്തിന് പിടിച്ചു പുറത്താക്കി” എന്നാണ് വിജിന സംഭവത്തെക്കുറിച്ച് പറഞ്ഞത്. ഈ ധീരമായ പ്രവർത്തിയെ അഭിനന്ദിച്ച് നിരവധി പേർ രംഗത്തെത്തി.
സംഭവ സമയത്ത് റേഷൻ കടയിൽ ജീവനക്കാരിയായ വിജിന മാത്രമാണ് ഉണ്ടായിരുന്നത്. സാധനങ്ങൾ വാങ്ങാൻ കുറച്ച് പേർ കടയിൽ ഉണ്ടായിരുന്നു. പെട്ടെന്നാണ് അക്രമാസക്തമായ ഒരു തെരുവുനായ കടയുടെ ഉള്ളിലേക്ക് ഓടിക്കയറിയത്. നായയെ കണ്ടതോടെ എല്ലാവരും പരിഭ്രാന്തരായി. പലരും പേടിച്ച് റേഷൻ കടയുടെ മൂലയിലേക്ക് ഒതുങ്ങി. എന്നാൽ വിജിന ഒട്ടും പതറാതെ നായയെ നേരിടാൻ തീരുമാനിച്ചു. മനുഷ്യരെ ഉപദ്രവിക്കാൻ ശ്രമിച്ച നായയുടെ കഴുത്തിൽ ബലമായി പിടികൂടി വിജിന അതിനെ കടയുടെ പുറത്തേക്ക് തള്ളിയിടുകയായിരുന്നു.
നായയെ പുറത്താക്കിയ ശേഷം വിജിന കടയുടെ ഷട്ടർ ഭാഗികമായി അടച്ചു. വിജിനയുടെ ഈ ധീരമായ നടപടിയാണ് വലിയൊരു അപകടം ഒഴിവാക്കിയത്. തെരുവുനായ ശല്യം വർധിച്ചു വരുന്ന സാഹചര്യത്തിൽ വിജിനയുടെ ഈ തന്റേടം അപകടകരമായ ഒരു സാഹചര്യത്തെ എങ്ങനെ നേരിടണം എന്നതിന് ഒരു ഉദാഹരണമാണ്. വിജിനയെ അഭിനന്ദിച്ച് സാമൂഹിക മാധ്യമങ്ങളിൽ നിരവധി പേർ അഭിപ്രായം പങ്കുവയ്ക്കുന്നുണ്ട്.
