മലയാളികളുടെ പ്രിയ താരം മോഹൻലാലിന്റെ മകൾ വിസ്മയ മോഹൻലാൽ പങ്കുവെച്ച പുത്തൻ ചിത്രങ്ങൾ സോഷ്യൽ മീഡിയയിൽ വൈറലാകുന്നു. 2025 വർഷം അവസാനിക്കാൻ ദിവസങ്ങൾ മാത്രം ബാക്കിനിൽക്കെ, ഈ വർഷത്തെ തന്റെ ജീവിതത്തിലെ ഏറ്റവും മനോഹരമായ നിമിഷങ്ങൾ കോർത്തിണക്കിയാണ് താരം ചിത്രങ്ങൾ പങ്കുവെച്ചിരിക്കുന്നത്. അച്ഛൻ മോഹൻലാൽ, അമ്മ സുചിത്ര, സഹോദരൻ പ്രണവ് മോഹൻലാൽ എന്നിവർക്കൊപ്പമുള്ള അപൂർവ്വ നിമിഷങ്ങളാണ് വിസ്മയയുടെ ക്യാമറയിൽ പതിഞ്ഞിരിക്കുന്നത്.
സഹോദരൻ പ്രണവിനെപ്പോലെ തന്നെ യാത്രകളെ ഏറെ ഇഷ്ടപ്പെടുന്ന വിസ്മയ, തന്റെ യാത്രാചിത്രങ്ങളും വളർത്തുമൃഗങ്ങൾക്കൊപ്പമുള്ള രസകരമായ നിമിഷങ്ങളും ഈ പോസ്റ്റിൽ ഉൾപ്പെടുത്തിയിട്ടുണ്ട്. “2025-ലെ പ്രിയപ്പെട്ട ഓർമ്മകൾ” എന്ന കുറിപ്പോടെയാണ് വിസ്മയ ചിത്രങ്ങൾ ഇൻസ്റ്റാഗ്രാമിൽ പോസ്റ്റ് ചെയ്തത്. പ്രിയതാരത്തിന്റെ കുടുംബചിത്രങ്ങൾ കണ്ട ആവേശത്തിലാണ് ആരാധകർ. പലപ്പോഴും സിനിമയിൽ നിന്നും സോഷ്യൽ മീഡിയയിൽ നിന്നും വിട്ടുനിൽക്കുന്ന പ്രണവിനെ ചിത്രങ്ങളിൽ കണ്ടതിലുള്ള സന്തോഷവും ആരാധകർ കമന്റുകളിലൂടെ പങ്കുവെക്കുന്നുണ്ട്.
അച്ഛന്റെയും സഹോദരന്റെയും പാത പിന്തുടർന്ന് വിസ്മയയും സിനിമാ ലോകത്തേക്ക് ചുവടുവെക്കുന്ന വർഷം കൂടിയാണ് 2025. ജൂഡ് ആന്തണി ജോസഫ് സംവിധാനം ചെയ്യുന്ന ‘തുടക്കം’ എന്ന ചിത്രത്തിലൂടെയാണ് വിസ്മയയുടെ അരങ്ങേറ്റം. സിനിമയുടെ തിരക്കുകൾക്കിടയിലും കുടുംബത്തോടൊപ്പം ചെലവഴിക്കാൻ സമയം കണ്ടെത്തുന്ന വിസ്മയയുടെ ഈ ചിത്രങ്ങൾ ഇതിനോടകം തന്നെ ഇന്റർനെറ്റിൽ തരംഗമായി മാറിക്കഴിഞ്ഞു.
