കുവൈത്ത് സിറ്റി: കുവൈത്തിനെ നടുക്കി വിഷമദ്യ ദുരന്തം. വിഷമദ്യം കഴിച്ചതിനെ തുടർന്ന് 10 പേർ മരിച്ചു. നിരവധി പേർക്ക് കാഴ്ച നഷ്ടപ്പെടുകയും ഗുരുതരാവസ്ഥയിൽ ആശുപത്രിയിൽ ചികിത്സയിൽ കഴിയുകയും ചെയ്യുന്നുണ്ട്. മരിച്ചവരിൽ മലയാളികളും ഉൾപ്പെട്ടിട്ടുണ്ടെന്നാണ് പ്രാഥമിക സൂചനകൾ. ഇവരെക്കുറിച്ചുള്ള വിവരങ്ങൾ അധികൃതർ പുറത്തുവിട്ടിട്ടില്ല.
വിഷമദ്യം കഴിച്ചതിനെ തുടർന്ന് കുഴഞ്ഞുവീണാണ് പലരെയും ആശുപത്രിയിൽ പ്രവേശിപ്പിച്ചത്. ചികിത്സയിൽ കഴിയുന്ന ചിലരുടെ നില അതീവ ഗുരുതരമായി തുടരുകയാണ്. ഇവർക്ക് കാഴ്ച പൂർണ്ണമായി നഷ്ടപ്പെടാൻ സാധ്യതയുണ്ടെന്ന് ഡോക്ടർമാർ പറയുന്നു. സംഭവത്തിൽ കുവൈത്ത് പോലീസ് അന്വേഷണം ആരംഭിച്ചിട്ടുണ്ട്. വിഷമദ്യം നിർമ്മിച്ചവരെയും വിതരണം ചെയ്തവരെയും കണ്ടെത്താനുള്ള ശ്രമങ്ങൾ നടന്നുവരികയാണ്
ഈ സംഭവം കുവൈത്തിലെ പ്രവാസി സമൂഹത്തിൽ വലിയ ഞെട്ടലാണ് ഉണ്ടാക്കിയിരിക്കുന്നത്. ഇത്തരം ദുരന്തങ്ങൾ ആവർത്തിക്കാതിരിക്കാൻ അധികൃതർ കർശന നടപടികൾ സ്വീകരിക്കണമെന്നാണ് ആവശ്യം. മരിച്ചവരുടെ മൃതദേഹങ്ങൾ നാട്ടിലേക്ക് കൊണ്ടുപോകുന്നതിനുള്ള നടപടികൾ പുരോഗമിക്കുകയാണ്. കൂടുതൽ വിവരങ്ങൾ ലഭ്യമാകുന്നതിനനുസരിച്ച് പോലീസ് അറിയിക്കുമെന്ന് അറിയിച്ചു.
