പ്രീമിയം ബൈക്ക് നിർമ്മാതാക്കളായ ബിഎംഡബ്ല്യു മോട്ടോറാഡ് (BMW Motorrad) ഇന്ത്യയിലെ തങ്ങളുടെ മുഴുവൻ മോഡലുകൾക്കും വില വർധിപ്പിക്കുന്നു. 2026 ജനുവരി 1 മുതൽ പുതിയ വില നിലവിൽ വരുമെന്ന് കമ്പനി ഔദ്യോഗികമായി അറിയിച്ചു. വാഹനങ്ങളുടെ മോഡലുകൾക്ക് അനുസരിച്ച് ആറ് ശതമാനം വരെയായിരിക്കും വില വർധനവ്. പുതുവർഷത്തിൽ വാഹനം വാങ്ങാൻ പദ്ധതിയിടുന്നവർക്ക് ഇത് വലിയ തിരിച്ചടിയാകും.
അന്താരാഷ്ട്ര വിപണിയിൽ ഡോളറിനും യൂറോയ്ക്കും എതിരെ ഇന്ത്യൻ രൂപയുടെ മൂല്യം ഇടിഞ്ഞതാണ് ഈ വില വർധനവിന് പ്രധാന കാരണമായി കമ്പനി ചൂണ്ടിക്കാട്ടുന്നത്. ഇതോടൊപ്പം അസംസ്കൃത വസ്തുക്കളുടെ വിലക്കയറ്റവും ഗതാഗത ചെലവിലുണ്ടായ വർധനവും കമ്പനിയെ ഈ തീരുമാനത്തിലേക്ക് നയിച്ചു. ബിഎംഡബ്ല്യു ഗ്രൂപ്പ് ഇന്ത്യ പ്രസിഡന്റ് ഹർദീപ് സിംഗ് ബ്രാർ ആണ് ഈ വിവരം മാധ്യമങ്ങളെ അറിയിച്ചത്.
ഇന്ത്യയിൽ നിർമ്മിക്കുന്ന ജി 310 ആർ (G 310 R), ജി 310 ജിഎസ് (G 310 GS) തുടങ്ങിയ എൻട്രി ലെവൽ മോഡലുകൾക്കും വിദേശത്തുനിന്ന് ഇറക്കുമതി ചെയ്യുന്ന ആഡംബര ബൈക്കുകൾക്കും ഈ വില വർധന ബാധകമായിരിക്കും. നിലവിൽ 2.81 ലക്ഷം രൂപ മുതൽ 48.63 ലക്ഷം രൂപ വരെയാണ് ബിഎംഡബ്ല്യു ബൈക്കുകളുടെ എക്സ്-ഷോറൂം വില. ജനുവരി മുതൽ ഈ തുകയിൽ വലിയ മാറ്റമുണ്ടാകും.
