ശബരിമല സന്നിധാനത്ത് ഭക്തർക്കായി വിതരണം ചെയ്യാൻ എത്തിച്ച 16 ലക്ഷം രൂപ വിലമതിക്കുന്ന നെയ്യ് പാക്കറ്റുകൾ കാണാനില്ലെന്ന് റിപ്പോർട്ട്. മണ്ഡലകാലത്ത് വിൽപനയ്ക്കായി കൗണ്ടറുകളിൽ ഏൽപ്പിച്ച 16,000 നെയ്യ് പാക്കറ്റുകളാണ് അപ്രത്യക്ഷമായത്. നെയ്യഭിഷേകം നടത്താൻ സാധിക്കാത്ത തീർത്ഥാടകർക്ക് കൗണ്ടറുകൾ വഴി വിതരണം ചെയ്യുന്ന ‘ആടിയ ശിഷ്ടം നെയ്യ്’ പാക്കറ്റുകളിലാണ് ഈ വൻ ക്രമക്കേട് കണ്ടെത്തിയിരിക്കുന്നത്. 100 മില്ലി ലിറ്ററിന്റെ ഒരു പാക്കറ്റിന് 100 രൂപ നിരക്കിലാണ് ദേവസ്വം ബോർഡ് വിൽപന നടത്തുന്നത്.
സംഭവത്തിൽ ദേവസ്വം വിജിലൻസ് വിശദമായ അന്വേഷണം ആരംഭിച്ചു. വിൽപനയ്ക്കായി നൽകിയ പാക്കറ്റുകളുടെ എണ്ണവും കൗണ്ടറുകളിൽ നിന്ന് ലഭിച്ച തുകയും തമ്മിൽ വലിയ വ്യത്യാസമുണ്ടെന്ന് പ്രാഥമിക പരിശോധനയിൽ വ്യക്തമായി. കൗണ്ടറുകളുടെ ചുമതലയുള്ള ഉദ്യോഗസ്ഥർ കൃത്യമായ കണക്കുകൾ സൂക്ഷിക്കാത്തതാണ് ഇത്തരം ഒരു വെട്ടിപ്പിന് വഴിയൊരുക്കിയതെന്നാണ് സൂചന. വിൽപന നടത്തിയ പാക്കറ്റുകളുടെ തുക ദേവസ്വം അക്കൗണ്ടിലേക്ക് കൃത്യമായി എത്തിയിട്ടില്ലെന്ന് വിജിലൻസ് കണ്ടെത്തിയിട്ടുണ്ട്.
ശബരിമലയിലെ സ്വർണ്ണപ്പാളി വിവാദത്തിന് പിന്നാലെ നെയ്യിന്റെ കാര്യത്തിലും ക്രമക്കേട് പുറത്തുവന്നത് വലിയ ചർച്ചയായിരിക്കുകയാണ്. കൗണ്ടറുകളിൽ ഡ്യൂട്ടിയിലുണ്ടായിരുന്ന ഉദ്യോഗസ്ഥരെ കേന്ദ്രീകരിച്ചാണ് നിലവിൽ അന്വേഷണം പുരോഗമിക്കുന്നത്. വരും ദിവസങ്ങളിൽ കൂടുതൽ പരിശോധനകൾ നടത്തി കുറ്റക്കാർക്കെതിരെ കർശന നടപടി സ്വീകരിക്കുമെന്ന് അധികൃതർ അറിയിച്ചു. വഴിപാട് സാധനങ്ങളുടെ വിതരണത്തിൽ സുതാര്യത ഉറപ്പാക്കാൻ പുതിയ സംവിധാനങ്ങൾ ഏർപ്പെടുത്തണമെന്ന ആവശ്യവും ഭക്തർക്കിടയിൽ ഉയരുന്നുണ്ട്.
