ന്യൂഡൽഹി: ഓൺലൈൻ ഡെലിവറി മേഖലയിലെ ചൂഷണങ്ങൾക്കും സുരക്ഷിതമല്ലാത്ത ജോലി സാഹചര്യങ്ങൾക്കുമെതിരെ രാജ്യവ്യാപക പണിമുടക്കുമായി ഗിഗ് തൊഴിലാളികൾ. പുതുവർഷ തലേന്ന് നടന്ന ഈ സമരം സ്വിഗ്ഗി, സൊമാറ്റോ, സെപ്റ്റോ, ബ്ലിങ്കിറ്റ് തുടങ്ങിയ പ്രമുഖ പ്ലാറ്റ്ഫോമുകളുടെ പ്രവർത്തനത്തെ സാരമായി ബാധിച്ചു. പ്രധാനമായും ’10 മിനിറ്റ് ഡെലിവറി’ എന്ന അതിവേഗ വിതരണ രീതി നിർത്തലാക്കണമെന്നും തൊഴിലാളികളുടെ റോഡ് സുരക്ഷ ഉറപ്പാക്കണമെന്നുമാണ് സമരക്കാരുടെ പ്രധാന ആവശ്യം.
അമിത വേഗതയിൽ വാഹനം ഓടിക്കാൻ പ്രേരിപ്പിക്കുന്ന കമ്പനികളുടെ നയം വലിയ അപകടങ്ങൾക്ക് കാരണമാകുന്നുവെന്ന് തൊഴിലാളി യൂണിയനുകൾ ആരോപിക്കുന്നു. കൃത്യസമയത്ത് ഡെലിവറി എത്തിക്കാൻ സാധിച്ചില്ലെങ്കിൽ പിഴ ചുമത്തുന്നതും ഐഡി ബ്ലോക്ക് ചെയ്യുന്നതും നീതികേടാണെന്ന് ഇവർ ചൂണ്ടിക്കാട്ടുന്നു. നിലവിലുള്ള കുറഞ്ഞ വേതന നിരക്ക് പരിഷ്കരിക്കണമെന്നും ഇന്ധനവില വർദ്ധനവിന് അനുസൃതമായി ആനുകൂല്യങ്ങൾ നൽകണമെന്നും ആവശ്യപ്പെട്ട് ആയിരക്കണക്കിന് തൊഴിലാളികളാണ് ഇന്ന് ആപ്പുകളിൽ നിന്നും ലോഗ് ഔട്ട് ചെയ്ത് പ്രതിഷേധിച്ചത്.
തൊഴിൽ സുരക്ഷയ്ക്കൊപ്പം ആരോഗ്യ ഇൻഷുറൻസ്, അപകട മരണാനന്തര ആനുകൂല്യങ്ങൾ എന്നിവ ഉറപ്പാക്കണമെന്നും സമരക്കാർ ആവശ്യപ്പെട്ടു. പുതുവർഷാഘോഷത്തിന്റെ തിരക്കുള്ള സമയത്ത് നടന്ന പണിമുടക്ക് നഗരങ്ങളിലെ ഭക്ഷണ വിതരണത്തെയും നിത്യോപയോഗ സാധനങ്ങളുടെ ഡെലിവറിയെയും കാര്യമായി തടസ്സപ്പെടുത്തി. കേന്ദ്ര-സംസ്ഥാന സർക്കാരുകൾ ഇടപെട്ട് തങ്ങളുടെ പ്രശ്നങ്ങൾക്ക് ശാശ്വത പരിഹാരം കാണണമെന്നും അല്ലാത്തപക്ഷം സമരം ശക്തമാക്കുമെന്നും തൊഴിലാളി സംഘടനകൾ മുന്നറിയിപ്പ് നൽകി.
