തിരുവനന്തപുരം: 2026-ലെ കേരള നിയമസഭാ തിരഞ്ഞെടുപ്പിൽ നിർണ്ണായക മുന്നേറ്റം ലക്ഷ്യമിട്ട് ബിജെപി ‘മിഷൻ 2026’ പദ്ധതി പ്രഖ്യാപിച്ചു. അടുത്ത മാസം ജനുവരി 24-ന് മുൻപായി പ്രധാനമന്ത്രി നരേന്ദ്ര മോദി കേരളത്തിലെത്തി പദ്ധതിയുടെ ഔദ്യോഗിക പ്രഖ്യാപനം നടത്തും. തിരുവനന്തപുരത്ത് നടക്കുന്ന വിപുലമായ സമ്മേളനത്തിലാകും തിരഞ്ഞെടുപ്പ് തന്ത്രങ്ങൾക്ക് പ്രധാനമന്ത്രി തുടക്കം കുറിക്കുക. കേരളത്തിൽ ഇത്തവണ ഭരണം പിടിക്കാനോ അല്ലെങ്കിൽ നിർണ്ണായക ശക്തിയാകാനോ ഉള്ള പ്രവർത്തനങ്ങൾക്കാണ് പാർട്ടി രൂപം നൽകിയിരിക്കുന്നത്.
തിരഞ്ഞെടുപ്പിന് മുന്നോടിയായി സ്ഥാനാർത്ഥി നിർണ്ണയ നടപടികൾ ഇത്തവണ നേരത്തെ പൂർത്തിയാക്കാനാണ് കേന്ദ്ര നേതൃത്വത്തിന്റെ നിർദ്ദേശം. വിജയസാധ്യതയുള്ള മണ്ഡലങ്ങളിൽ ജനസമ്മതിയുള്ള നേതാക്കളെ നേരത്തെ തന്നെ കണ്ടെത്തി പ്രവർത്തനങ്ങൾ തുടങ്ങും. കഴിഞ്ഞ തദ്ദേശ തിരഞ്ഞെടുപ്പിൽ മികച്ച മുന്നേറ്റം നടത്തിയ മണ്ഡലങ്ങളിൽ പ്രത്യേക ശ്രദ്ധ കേന്ദ്രീകരിക്കാനാണ് തീരുമാനം. നേമം, വട്ടിയൂർക്കാവ്, കഴക്കൂട്ടം തുടങ്ങി ബിജെപിക്ക് ശക്തമായ സ്വാധീനമുള്ള മണ്ഡലങ്ങളിൽ ഇപ്പോഴത്തെ നേതാക്കളോട് പ്രവർത്തനം തുടരാൻ നിർദ്ദേശിച്ചിട്ടുണ്ട്.
കേന്ദ്ര ആഭ്യന്തര മന്ത്രി അമിത് ഷാ വരും ദിവസങ്ങളിൽ കേരളം സന്ദർശിച്ച് ബൂത്ത് തലത്തിലുള്ള പ്രവർത്തനങ്ങൾ വിലയിരുത്തും. ‘പന്ന പ്രമുഖ്’ സംവിധാനം ശക്തിപ്പെടുത്തി താഴെത്തട്ടിൽ പാർട്ടിയെ സജ്ജമാക്കാനാണ് അമിത് ഷായുടെ നേതൃത്വത്തിൽ പദ്ധതി തയ്യാറാക്കുന്നത്. ഇതിന് പുറമെ യുവാക്കൾക്കും വനിതകൾക്കും കൂടുതൽ പ്രാധാന്യം നൽകിക്കൊണ്ടുള്ള സ്ഥാനാർത്ഥി പട്ടികയാകും ബിജെപി അവതരിപ്പിക്കുക. സംസ്ഥാനത്തിന്റെ വികസനത്തിനായി ‘വികസിത് കേരളം’ എന്ന മുദ്രാവാക്യമുയർത്തിയാണ് ബിജെപി ഇത്തവണ വോട്ട് തേടുന്നത്.
