ശബരിമല സന്നിധാനത്ത് അയ്യപ്പസ്വാമിക്ക് മണ്ഡലപൂജയ്ക്ക് ചാർത്താനുള്ള തങ്കയങ്കി വഹിച്ചുള്ള ഘോഷയാത്ര ഇന്ന് (ഡിസംബർ 23) രാവിലെ ഏഴിന് ആറന്മുള പാർത്ഥസാരഥി ക്ഷേത്രത്തിൽ നിന്ന് പുറപ്പെട്ടു. പുലർച്ചെ അഞ്ചു മുതൽ ഭക്തർക്ക് തങ്കയങ്കി ദർശിക്കാനുള്ള സൗകര്യം ഒരുക്കിയിരുന്നു. വലിയ ശരണംവിളികളോടെയും ഭക്തിനിർഭരമായ ചടങ്ങുകളോടെയുമാണ് പ്രത്യേകം അലങ്കരിച്ച രഥത്തിൽ തങ്കയങ്കി സന്നിധാനത്തേക്ക് കൊണ്ടുപോകുന്നത്.
നാല് ദിവസങ്ങളിലായി വിവിധ ക്ഷേത്രങ്ങളിലെ സ്വീകരണങ്ങൾ ഏറ്റുവാങ്ങി ഡിസംബർ 26-ന് വൈകിട്ട് ഘോഷയാത്ര സന്നിധാനത്തെത്തും. അന്ന് വൈകിട്ട് തങ്കയങ്കി അയ്യപ്പവിഗ്രഹത്തിൽ ചാർത്തി ദീപാരാധന നടക്കും. മണ്ഡലകാല തീർത്ഥാടനം അവസാന ഘട്ടത്തിലേക്ക് കടന്നതോടെ ശബരിമലയിൽ ഭക്തരുടെ വൻ തിരക്കാണ് അനുഭവപ്പെടുന്നത്. തിരക്ക് നിയന്ത്രിക്കാൻ വിപുലമായ സുരക്ഷാ ക്രമീകരണങ്ങളാണ് പൊലീസ് ഏർപ്പെടുത്തിയിരിക്കുന്നത്.
ഡിസംബർ 27-ന് രാവിലെ 10.10-നും 11.30-നും ഇടയിലുള്ള ശുഭമുഹൂർത്തത്തിലാണ് മണ്ഡലപൂജ നടക്കുന്നത്. തമിഴ്നാട്, കർണാടക തുടങ്ങി അയൽസംസ്ഥാനങ്ങളിൽ നിന്നുള്ള തീർത്ഥാടകരുടെ പ്രവാഹം വർദ്ധിച്ച സാഹചര്യത്തിൽ വെർച്വൽ ക്യൂവിലും നിയന്ത്രണങ്ങൾ ഏർപ്പെടുത്തിയിട്ടുണ്ട്. മണ്ഡലപൂജയ്ക്ക് ശേഷം അന്ന് രാത്രി ഹരിവരാസനം പാടി നട അടയ്ക്കും. തുടർന്ന് മകരവിളക്ക് ഉത്സവത്തിനായി ഡിസംബർ 30-ന് വൈകിട്ട് നട വീണ്ടും തുറക്കും.
