പാലായുടെ സ്വന്തം രുചിപ്പെരുമയായ ആൻസ് ബേക്കേഴ്സ് വിദേശ വിപണിയിലും വൻ മുന്നേറ്റം നടത്തുന്നു. ഇക്കുറി യുഎസിലേക്കും യുകെയിലേക്കും അയച്ച ഓരോ കണ്ടെയ്നർ നിറയെ കേക്കുകൾ വെറും ദിവസങ്ങൾക്കൊണ്ടാണ് വിറ്റു തീർന്നത്. ക്രിസ്മസ് വിപണി ലക്ഷ്യമിട്ട് എത്തിച്ച പ്ലം കേക്കുകൾക്ക് വിദേശ മലയാളിൾക്കിടയിൽ ലഭിച്ച വൻ സ്വീകാര്യതയെത്തുടർന്ന് അടുത്ത കണ്ടെയ്നറുകൾക്കായി പുതിയ ഓർഡറുകൾ ലഭിച്ചുകഴിഞ്ഞു.
ഗുണനിലവാരത്തിലും രുചിയിലും ഒരുപോലെ വിട്ടുവീഴ്ച ചെയ്യാത്തതാണ് ആൻസ് കേക്കുകൾക്ക് വിദേശത്തും പ്രിയമേറാൻ കാരണം. ആൻസ് എന്ന പേര് അനുകരിക്കുന്നവർ വിപണിയിൽ ഉള്ളതിനാൽ, ഉപഭോക്താക്കളുടെ വിശ്വാസ്യത ഉറപ്പാക്കാൻ സ്ഥാപക അന്നമ്മ കൊട്ടുകാപ്പള്ളിയുടെ ചിത്രം പതിപ്പിച്ചാണ് യുഎസിൽ പലയിടത്തും കേക്കുകൾ വിറ്റഴിക്കുന്നത്. 1984-ൽ വീട്ടുമുറ്റത്ത് തുടങ്ങിയ ഈ സംരംഭം ഇന്ന് പാലായുടെ അടയാളമായി ലോകമെമ്പാടും പടർന്നു പന്തലിച്ചിരിക്കുകയാണ്.
കേരളത്തിന്റെ തനത് പ്ലം കേക്കുകൾക്ക് ആഗോളതലത്തിൽ ആവശ്യക്കാർ ഏറുന്ന സാഹചര്യത്തിൽ കൂടുതൽ രാജ്യങ്ങളിലേക്ക് കയറ്റുമതി വ്യാപിപ്പിക്കാനാണ് കമ്പനിയുടെ തീരുമാനം. പരമ്പരാഗതമായ റെസിപ്പിയും മികച്ച ചേരുവകളും ഉപയോഗിച്ച് തയ്യാറാക്കുന്ന കേക്കുകൾ കടൽ കടന്നും അവയുടെ ഫ്രഷ്നസ് നിലനിർത്തുന്നു എന്നതാണ് പ്രത്യേകത. വിദേശത്തെ മലയാളി കൂട്ടായ്മകളും ഇന്ത്യൻ സ്റ്റോറുകളും വഴിയാണ് ഈ വിതരണം നടക്കുന്നത്.
