കൊച്ചി: ഡേറ്റിംഗ് ആപ്പ് വഴി പരിചയപ്പെട്ട യുവാവിനെ വിശ്വസിച്ച് നാടും ജോലിയും ഉപേക്ഷിച്ചെത്തിയ കൊൽക്കത്ത സ്വദേശിനിയായ 23-കാരിക്ക് ലക്ഷങ്ങൾ നഷ്ടമായി. പ്രണയം നടിച്ച് യുവതിയെ കൊച്ചിയിലെത്തിച്ച യുവാവ്, പണവും സ്വർണ്ണാഭരണങ്ങളുമായി കടന്നുകളയുകയായിരുന്നു. കൊൽക്കത്തയിലെ പ്രമുഖ ഐടി കമ്പനിയിലെ ജോലിയും മാതാപിതാക്കളെയും ഉപേക്ഷിച്ചാണ് യുവതി യുവാവിനൊപ്പം ജീവിക്കാൻ കേരളത്തിലേക്ക് എത്തിയത്.
മാസങ്ങൾക്ക് മുൻപ് ഡേറ്റിംഗ് ആപ്പ് വഴിയാണ് ഇരുവരും പരിചയപ്പെട്ടത്. താൻ കൊച്ചിയിൽ ബിസിനസ് ചെയ്യുകയാണെന്നും ഒരുമിച്ച് താമസിക്കാമെന്നും യുവാവ് യുവതിയെ വിശ്വസിപ്പിച്ചു. ഇത് വിശ്വസിച്ച് മാസങ്ങൾക്കു മുൻപ് കൊച്ചിയിലെത്തിയ യുവതി യുവാവിനൊപ്പം വാടക വീട്ടിൽ താമസം തുടങ്ങി. ഈ കാലയളവിൽ വിവാഹ വാഗ്ദാനം നൽകി യുവതിയുടെ കൈവശമുണ്ടായിരുന്ന എട്ട് പവനിലധികം സ്വർണ്ണാഭരണങ്ങളും ബാങ്ക് അക്കൗണ്ടിലുണ്ടായിരുന്ന മൂന്ന് ലക്ഷത്തോളം രൂപയും വിവിധ ആവശ്യങ്ങൾക്കായി യുവാവ് കൈക്കലാക്കി.
കഴിഞ്ഞ ദിവസം യുവതി ഉറങ്ങിക്കിടക്കുന്ന സമയത്ത് വിലപിടിപ്പുള്ള വസ്തുക്കളും മൊബൈൽ ഫോണുമായി യുവാവ് വീടുവിട്ടു. യുവാവിനെ ഫോണിൽ ബന്ധപ്പെടാൻ ശ്രമിച്ചെങ്കിലും സ്വിച്ച് ഓഫ് ആയിരുന്നു. ഇതോടെയാണ് താൻ വഞ്ചിക്കപ്പെട്ടുവെന്ന് യുവതി തിരിച്ചറിഞ്ഞത്. തുടർന്ന് കൊച്ചി സിറ്റി പോലീസിൽ പരാതി നൽകുകയായിരുന്നു. യുവാവിന്റെ തിരിച്ചറിയൽ രേഖകൾ വ്യാജമാണെന്ന് പ്രാഥമിക അന്വേഷണത്തിൽ സംശയമുണ്ട്. സൈബർ സെല്ലിന്റെ സഹായത്തോടെ യുവാവിനെ കണ്ടെത്താനുള്ള ശ്രമത്തിലാണ് പോലീസ്.
