തിരുവനന്തപുരം: കേരളത്തിന്റെ ആയുർവേദ പാരമ്പര്യം ഉപയോഗിച്ച് വ്യാജ മരുന്ന് നിർമ്മാണം നടത്തിയതായി കണ്ടെത്തൽ. സംസ്ഥാനത്തെ ചില സ്ഥാപനങ്ങളിൽ നിന്ന് പിടിച്ചെടുത്ത ആയുർവേദ മരുന്നുകൾ കേരളത്തിൽ നിർമ്മിച്ചവയല്ലെന്നും, ഇവ രാജസ്ഥാനിൽ നിർമ്മിച്ചതാണെന്നും അധികൃതർ കണ്ടെത്തി. കേരളത്തിലെ ആയുർവേദത്തിൻ്റെ പേര് ഉപയോഗിച്ച് മറ്റ് സംസ്ഥാനങ്ങളിൽ നിർമ്മിക്കുന്ന വ്യാജ ഉൽപ്പന്നങ്ങൾ ഇവിടെ വിൽക്കുന്നത് ശ്രദ്ധയിൽപ്പെട്ടതോടെയാണ് ഡ്രഗ്സ് കൺട്രോൾ വകുപ്പ് റെയ്ഡ് നടത്തിയത്.
ഏറ്റവും ഗുരുതരമായ കണ്ടെത്തൽ, പിടിച്ചെടുത്ത ഈ ‘ആയുർവേദ’ മരുന്നുകളിൽ അലോപ്പതി മരുന്നുകളുടെ ചേരുവകൾ ഉണ്ടായിരുന്നു എന്നതാണ്. വേദന സംഹാരികളായ ചില അലോപ്പതി മരുന്നുകളുടെ ഘടകങ്ങളാണ് ആയുർവേദ മരുന്നുകളിൽ ചേർത്തിരുന്നത്. ഇത് രോഗികളുടെ ആരോഗ്യത്തിന് വളരെ ദോഷകരമാണ്. പെട്ടെന്ന് രോഗശമനം ലഭിക്കുന്നു എന്ന് തോന്നിപ്പിച്ച് ആളുകളെ ആകർഷിക്കാനാണ് ഈ രാസവസ്തുക്കൾ ചേർക്കുന്നത്. വിശദമായ ലാബ് പരിശോധനയിൽ ഈ വസ്തുതകൾ സ്ഥിരീകരിച്ചു.
വ്യാജ മരുന്ന് നിർമ്മാണത്തിനും വിതരണത്തിനും പിന്നിൽ പ്രവർത്തിച്ചവർക്കെതിരെ കടുത്ത നടപടി എടുക്കുമെന്ന് ഡ്രഗ്സ് കൺട്രോൾ വിഭാഗം അറിയിച്ചു. ഈ റാക്കറ്റിന്റെ വേരുകൾ കണ്ടെത്താൻ അന്വേഷണം ഊർജ്ജിതമാക്കി. വ്യാജ മരുന്ന് നിർമ്മാണത്തിന് പിന്നിൽ പ്രവർത്തിച്ചവർക്കെതിരെ കേസ് രജിസ്റ്റർ ചെയ്തു. ഇത്തരം വ്യാജ മരുന്നുകൾ ഉപയോഗിക്കരുതെന്ന് ആരോഗ്യ വകുപ്പ് പൊതുജനങ്ങൾക്ക് മുന്നറിയിപ്പ് നൽകി.
