കൊച്ചി: ‘ഭൂതകാലം’, ‘ഭ്രമയുഗം’ എന്നീ ചിത്രങ്ങളിലൂടെ മലയാള സിനിമയിൽ ഹൊറർ വിഭാഗത്തിന് പുതിയ മാനം നൽകിയ സംവിധായകൻ രാഹുൽ സദാശിവൻ, നടൻ പ്രണവ് മോഹൻലാലിനൊപ്പം ഒരുമിക്കുന്ന ‘ഡീയസ് ഈറെ’ (Dies Irae) എന്ന ചിത്രത്തിന് ഗംഭീര പ്രതികരണം. സിനിമയുടെ പ്രീമിയർ ഷോ കണ്ടിറങ്ങിയ പ്രേക്ഷകർ നൽകുന്ന റിപ്പോർട്ടുകൾ പ്രതീക്ഷകൾ വാനോളം ഉയർത്തുന്നതാണ്. ‘ക്രോധത്തിന്റെ ദിനം’ എന്ന ടാഗ് ലൈനോടെ എത്തുന്ന ഈ ഹൊറർ ത്രില്ലർ, പ്രണവ് മോഹൻലാലിന്റെ കരിയറിലെ മികച്ച പ്രകടനങ്ങളിൽ ഒന്നായിരിക്കുമെന്നാണ് ആദ്യ റിപ്പോർട്ടുകൾ സൂചിപ്പിക്കുന്നത്. ഹൊറർ സിനിമയുടെ രീതിശാസ്ത്രത്തെ മാറ്റിമറിക്കാൻ ശേഷിയുള്ള ഒരു ഓഡിയോ-വിഷ്വൽ വിരുന്നാണ് രാഹുൽ സദാശിവൻ ഒരുക്കിയിരിക്കുന്നത്.
ഡീയസ് ഈറെ’യിൽ രോഹൻ എന്ന കഥാപാത്രത്തെയാണ് പ്രണവ് മോഹൻലാൽ അവതരിപ്പിക്കുന്നത്. പ്രണവിന്റെ അഭിനയ ജീവിതത്തിലെ ഏറ്റവും പക്വതയാർന്ന പ്രകടനമാണിതെന്ന് പ്രേക്ഷകരും നിരൂപകരും ഒരേ സ്വരത്തിൽ പറയുന്നു. ദുർമരണം, പ്രതികാരം, ആഭിചാരം തുടങ്ങിയ ഘടകങ്ങൾ സിനിമയിൽ ഉപയോഗിക്കുമ്പോഴും, കഥാപാത്രങ്ങളുടെ മനഃശാസ്ത്രപരമായ തലങ്ങളിലൂടെയാണ് സംവിധായകൻ സഞ്ചരിക്കുന്നത്. സാങ്കേതിക മികവിന്റെ കാര്യത്തിലും ചിത്രം മുന്നിട്ട് നിൽക്കുന്നു. ഛായാഗ്രഹണം, സംഗീതം, സൗണ്ട് ഡിസൈൻ എന്നിവയെല്ലാം സിനിമയ്ക്ക് ഒരു അന്താരാഷ്ട്ര നിലവാരം നൽകിയിട്ടുണ്ട്. ഹൊറർ സിനിമകൾ കാണാൻ ഇഷ്ടപ്പെടുന്നവർക്ക് ഇതൊരു തിയേറ്റർ അനുഭവം തന്നെയായിരിക്കും.
വലിയ പ്രേക്ഷക ശ്രദ്ധ നേടിയ ‘ഭ്രമയുഗ’ത്തിനു ശേഷം രാഹുൽ സദാശിവനും നൈറ്റ് ഷിഫ്റ്റ് സ്റ്റുഡിയോസും ഒരുമിക്കുന്ന ചിത്രം കൂടിയാണ് ‘ഡീയസ് ഈറെ’. ഈ കൂട്ടുകെട്ട് ഒരിക്കൽ കൂടി വിജയം കണ്ടതിൽ സിനിമാലോകം ആവേശത്തിലാണ്. സിനിമയുടെ സാങ്കേതിക വശങ്ങൾ കൈകാര്യം ചെയ്ത ഷെഹ്നാദ് ജലാലും സംഗീതം നൽകിയ ക്രിസ്റ്റോ സേവ്യറും അഭിനന്ദനം അർഹിക്കുന്നു. സിനിമയുടെ ക്ലൈമാക്സിനെക്കുറിച്ചും പ്രണവ് അവതരിപ്പിച്ച കഥാപാത്രത്തിന്റെ പ്രത്യേകതകളെക്കുറിച്ചും സോഷ്യൽ മീഡിയയിൽ വലിയ ചർച്ചകളാണ് നടക്കുന്നത്. ‘വേട്ടയാടും ഈ ഡീയസ് ഈറെ’ എന്ന ടാഗ് ലൈൻ അന്വർത്ഥമാക്കും വിധം, മികച്ച രീതിയിലുള്ള ഹൊറർ അനുഭവം നൽകാൻ സിനിമയ്ക്ക് കഴിഞ്ഞിട്ടുണ്ട്.
