കൊച്ചി: നടനും നിർമാതാവുമായ ഷറഫുദ്ദീനോട് നടൻ വിനായകൻ ചൂടായി സംസാരിക്കുന്ന വിഡിയോ ദൃശ്യങ്ങൾ സമൂഹമാധ്യമങ്ങളിൽ വൈറലായി. ‘ഒരു നിർമാതാവ് എത്ര കാലം ഇത് സഹിക്കണം’ എന്ന തലക്കെട്ടോടെ ഷറഫുദ്ദീൻ തന്നെയാണ് ഈ വിഡിയോ തന്റെ സോഷ്യൽ മീഡിയ പേജുകളിൽ പങ്കുവെച്ചത്. പുതിയ സിനിമയുടെ സെറ്റിൽ വെച്ചുണ്ടായ സംഭവമാണ് വിഡിയോയിൽ ഉള്ളതെങ്കിലും, ഇത് സിനിമയുടെ പ്രൊമോഷന്റെ ഭാഗമായുള്ള ഒരു രസകരമായ രംഗം മാത്രമാണെന്നാണ് റിപ്പോർട്ട്. ‘ഡേറ്റിന്റെ’ കാര്യത്തെ ചൊല്ലിയാണ് വിനായകൻ കാരവനുള്ളിലിരുന്ന് ഷറഫുദ്ദീനോട് ദേഷ്യപ്പെടുന്നത്. വിനായകന്റെ ചോദ്യങ്ങൾക്ക് സമാധാനപരമായി മറുപടി നൽകുന്ന ഷറഫുദ്ദീനെയാണ് വിഡിയോയുടെ ആദ്യ ഭാഗത്ത് കാണാൻ കഴിയുന്നത്.
പ്രൊഡ്യൂസർ കൂടിയായ ഷറഫുദ്ദീൻ ഏറെ നേരം വിനായകനെ സമാധാനിപ്പിക്കാൻ ശ്രമിച്ചെങ്കിലും വിനായകൻ ദേഷ്യപ്പെടുന്നത് തുടരുന്നതായി വിഡിയോയിൽ കാണാം. തുടർന്ന് ഷറഫുദ്ദീൻ കാരവന്റെ വാതിൽ വലിച്ചടച്ച് ഒരു നെടുവീർപ്പോടെ തിരിഞ്ഞു നടക്കുന്നു. ഈ രംഗം കണ്ട് സിനിമാ ലോകം ഒരു നിമിഷം അമ്പരന്നെങ്കിലും, വിഡിയോയുടെ രണ്ടാം ഭാഗം പുറത്തുവന്നതോടെയാണ് ഇതിലെ ട്വിസ്റ്റ് വ്യക്തമായത്. ഒരു മണിക്കൂർ കഴിഞ്ഞുള്ള രംഗം എന്ന കുറിപ്പോടെയാണ് വിഡിയോയുടെ അടുത്ത ഭാഗം ആരംഭിക്കുന്നത്. ഈ ഭാഗത്ത് വിനായകൻ റോളർകോസ്റ്റർ റൈഡുകൾ ആസ്വദിക്കുന്നതും, ചിരിച്ചുകൊണ്ട് സെറ്റിൽ നിൽക്കുന്നതുമായ ദൃശ്യങ്ങളാണ് ഉള്ളത്.
ഷറഫുദ്ദീൻ പ്രധാന വേഷത്തിലെത്തുന്ന ‘പെറ്റ് ഡിറ്റക്ടീവ്’ എന്ന സിനിമയുടെ പ്രൊമോഷന്റെ ഭാഗമായാണ് ഈ വിഡിയോ പുറത്തിറക്കിയിരിക്കുന്നത്. ഈ സിനിമയിൽ യാഖത് അലി എന്ന രസകരമായ കഥാപാത്രത്തെയാണ് വിനായകൻ അവതരിപ്പിച്ചത്. റോളർകോസ്റ്റർ റൈഡ് ഉൾപ്പെടുന്ന സിനിമയിലെ ക്ലൈമാക്സ് രംഗം ഏറെ ചിരിയുണർത്തുന്നതായിരുന്നു. ഈ രംഗത്തിന്റെ ഒരംശം കൂടി ഉൾപ്പെടുത്തിയാണ് വിഡിയോ അവസാനിപ്പിക്കുന്നത്. വിനായകന്റെ അഭിനയവും ഷറഫുദ്ദീന്റെ പ്രതികരണവും സോഷ്യൽ മീഡിയയിൽ ചിരി പടർത്തി. സിനിമയ്ക്ക് കിട്ടിയ മികച്ച പ്രതികരണത്തിന്റെ ഭാഗമായി അണിയറ പ്രവർത്തകർ ചെയ്ത ഈ പ്രൊമോഷൻ തന്ത്രം ഇപ്പോൾ വൈറലായി മാറിയിരിക്കുകയാണ്.
