മുൻ പ്രധാനമന്ത്രി ഇന്ദിര ഗാന്ധിയുടെ 41-ാം രക്തസാക്ഷിത്വ വാർഷികത്തിൽ രാജ്യം ഇന്ന് ആദരവോടെ സ്മരിക്കുന്നു. ഒക്ടോബർ 31, 1984-ൽ സ്വന്തം സുരക്ഷാ ഭടന്മാരുടെ വെടിയേറ്റ് വീരമൃത്യു വരിച്ച ഇന്ദിര, ഇന്ത്യൻ രാഷ്ട്രീയത്തിൽ ഒരിക്കലും മാഞ്ഞുപോകാത്ത ഒരധ്യായമാണ്. ഇന്ത്യയുടെ പ്രഥമ വനിതാ പ്രധാനമന്ത്രി എന്ന നിലയിൽ അവർ കൈക്കൊണ്ട ധീരമായ നിലപാടുകളും വിപ്ലവകരമായ പരിഷ്കാരങ്ങളും ഒരു കാലഘട്ടത്തെ അടയാളപ്പെടുത്തുന്നു. രാജ്യത്തിന്റെ അഖണ്ഡതയ്ക്കും പുരോഗതിക്കും വേണ്ടി നിലകൊണ്ട ആ ഭരണാധികാരിയെയാണ് ഈ ദിനത്തിൽ രാജ്യം ഓർത്തെടുക്കുന്നത്.
ഇന്ദിര ഗാന്ധിയുടെ ഭരണകാലം നിർണ്ണായകമായ നിരവധി സംഭവങ്ങൾക്ക് സാക്ഷ്യം വഹിച്ചു. ബാങ്കുകളുടെ ദേശസാൽക്കരണം, രാജാക്കന്മാർക്ക് നൽകിയിരുന്ന പ്രിവീ പേഴ്സ് നിർത്തലാക്കൽ തുടങ്ങിയ സാമ്പത്തിക പരിഷ്കാരങ്ങൾ സാധാരണ ജനങ്ങൾക്ക് വലിയ പ്രതീക്ഷ നൽകി. 1971-ലെ ഇന്തോ-പാക് യുദ്ധത്തിൽ ഇന്ത്യ നേടിയ അവിസ്മരണീയ വിജയം, ബംഗ്ലാദേശ് എന്ന പുതിയ രാജ്യത്തിന്റെ പിറവിക്ക് വഴിയൊരുക്കി. ലോക രാഷ്ട്രീയത്തിൽ ഇന്ത്യയുടെ സ്ഥാനം ഉറപ്പിക്കുന്നതിൽ ഈ വിജയം നിർണ്ണായകമായി. ശക്തമായ നേതൃപാടവം കൊണ്ട് അവർ ‘ഇന്ത്യയുടെ ഉരുക്കുവനിത’ എന്ന വിശേഷണം സ്വന്തമാക്കി. പോഖ്റാനിലെ ആണവ പരീക്ഷണത്തിലൂടെ ലോകശക്തികൾക്കിടയിൽ ഇന്ത്യയുടെ കരുത്ത് പ്രഖ്യാപിച്ചതും ഇന്ദിരൻ ഭരണത്തിന്റെ തിളക്കമാർന്ന നേട്ടമാണ്.
അവസാന നാളുകളിൽ രാജ്യത്തിന്റെ അഖണ്ഡതയ്ക്ക് വേണ്ടി സ്വന്തം ജീവൻ ബലികഴിക്കാൻ തയ്യാറാണെന്ന് അവർ പ്രഖ്യാപിച്ചിരുന്നു. “എന്റെ ഓരോ തുള്ളി ചോരയും രാജ്യത്തിൻ്റെ വളർച്ചയ്ക്കും ശക്തിക്കും വേണ്ടി സമർപ്പിക്കുന്നു” എന്ന അവരുടെ വാക്കുകൾ രക്തസാക്ഷിത്വത്തിന് മണിക്കൂറുകൾക്ക് മുമ്പ് ഭുവനേശ്വറിൽ നടന്ന റാലിയിൽ മുഴങ്ങി കേട്ടു. അവരുടെ രക്തസാക്ഷിത്വ ദിനമായ ഇന്ന്, കോൺഗ്രസ് നേതാക്കളും പ്രവർത്തകരും രാജ്യത്തുടനീളമുള്ള ജനങ്ങളും അവരുടെ സ്മൃതി മണ്ഡപമായ ഡൽഹിയിലെ ശക്തിസ്ഥലിൽ പുഷ്പാർച്ചന നടത്തി ആദരം അർപ്പിക്കുന്നു. കാലമെത്ര കഴിഞ്ഞാലും ഇന്ത്യൻ ജനതയുടെ ഹൃദയത്തിൽ സ്നേഹാദരങ്ങളോടെ ഇന്ദിര ഗാന്ധി ജീവിക്കുമെന്ന ഓർമ്മപ്പെടുത്തലാണ് ഈ ദിനാചരണം.
