അതിമനോഹരമായ പ്രകൃതി സൗന്ദര്യത്താൽ സഞ്ചാരികളുടെ ഇഷ്ടതാവളമായി മാറിയിരിക്കുകയാണ് ഇടുക്കിയിലെ വാഗമൺ. മഞ്ഞും മലയും മഴയും ഒരുമിച്ചു ആസ്വദിക്കാൻ സാധിക്കുന്ന ഈ കാലാവസ്ഥയിൽ വിനോദസഞ്ചാരികളുടെ വൻ പ്രവാഹമാണ് വാഗമണ്ണിലേക്ക് ഉണ്ടായിക്കൊണ്ടിരിക്കുന്നത്. അവധി ദിവസങ്ങളിലും അല്ലാതെയും കുടുംബങ്ങളായും സുഹൃത്തുക്കളോടൊപ്പവും നിരവധി പേരാണ് ഇവിടെ എത്തിച്ചേരുന്നത്. മൊട്ടക്കുന്നുകളും പൈൻമരക്കാടുകളും നിറഞ്ഞ വാഗമണ്ണിലെ പ്രധാന ടൂറിസം കേന്ദ്രങ്ങളെല്ലാം ഇപ്പോൾ ജനസാഗരമാണ്. ഈ സീസണിലെ ഏറ്റവും വലിയ തിരക്കാണ് ഇപ്പോൾ വാഗമണിൽ അനുഭവപ്പെടുന്നത്.
പുൽമേടുകളിൽ കോടമഞ്ഞ് പുതച്ച കാഴ്ചയും, ഇടയ്ക്കിടെ പെയ്യുന്ന മഴയും, തണുത്ത കാറ്റുമെല്ലാം വാഗമണിന്റെ മനോഹാരിതയ്ക്ക് മാറ്റുകൂട്ടുന്നു. ഇവിടുത്തെ അഡ്വഞ്ചർ പാർക്ക്, വാഗമൺ തങ്ങൾപാറ, മൊട്ടക്കുന്ന്, പൈൻ ഫോറസ്റ്റ് തുടങ്ങിയ ഇടങ്ങളിലെല്ലാം വൻ തിരക്കാണ്. സഞ്ചാരികളുടെ എണ്ണം വർധിച്ചതോടെ പ്രദേശത്തെ വ്യാപാരികൾക്കും റിസോർട്ട് ഉടമകൾക്കും ഇത് വലിയ ആശ്വാസമായിരിക്കുകയാണ്. റിസോർട്ടുകളിലും ഹോം സ്റ്റേകളിലുമെല്ലാം ദിവസങ്ങൾക്കു മുൻപേ ബുക്കിങ്ങുകൾ പൂർത്തിയായി കഴിഞ്ഞു. മഴ ശക്തമാകുന്നതോടെ പലയിടത്തും ഗതാഗതക്കുരുക്കും ഉണ്ടാക്കുന്നുണ്ട്.
സഞ്ചാരികളുടെ തിരക്ക് കണക്കിലെടുത്ത് വാഗമണിലെ ക്രമസമാധാന പാലനത്തിനായി കൂടുതൽ പോലീസിനെ വിന്യസിച്ചിട്ടുണ്ട്. പാർക്കിംഗ് സൗകര്യങ്ങൾ മെച്ചപ്പെടുത്താനും മാലിന്യ സംസ്കരണത്തിനായി കൂടുതൽ സംവിധാനങ്ങൾ ഏർപ്പെടുത്താനും ടൂറിസം വകുപ്പ് നടപടികൾ സ്വീകരിച്ചിട്ടുണ്ട്. ഈ പ്രകൃതി സൗന്ദര്യം നിലനിർത്താൻ സഞ്ചാരികൾ സഹകരിക്കണമെന്നും പ്ലാസ്റ്റിക് മാലിന്യം നിക്ഷേപിക്കുന്നതിൽ നിന്ന് വിട്ടുനിൽക്കണമെന്നും ടൂറിസം പ്രൊമോഷൻ കൗൺസിൽ അഭ്യർഥിച്ചു. വരും ദിവസങ്ങളിലും വാഗമണിൽ സഞ്ചാരികളുടെ ഒഴുക്ക് തുടരുമെന്നാണ് പ്രതീക്ഷിക്കുന്നത്.
