തിരുവനന്തപുരം: സംസ്ഥാനത്തെ ഒഴിഞ്ഞു കിടക്കുന്ന വീടുകളെയും കെട്ടിടങ്ങളെയും ചെറുകിട വ്യവസായ സംരംഭങ്ങൾക്കായി ഉപയോഗപ്പെടുത്തുന്ന പുതിയ പദ്ധതിയുമായി സർക്കാർ. ‘മിഷൻ 10000’ എന്ന പേരിൽ വ്യവസായ വകുപ്പ് ഉടൻ നടപ്പാക്കുന്ന ഈ പദ്ധതി വഴി, പുതിയ സംരംഭകർക്ക് വാടക കുറഞ്ഞ സ്ഥലസൗകര്യങ്ങൾ ലഭ്യമാകും. സംസ്ഥാനത്തുടനീളമുള്ള ആയിരക്കണക്കിന് വീടുകൾ, വാണിജ്യേതര കെട്ടിടങ്ങൾ എന്നിവ ഈ പദ്ധതിയുടെ ഭാഗമായി സംരംഭങ്ങൾക്ക് തുറന്നു കൊടുക്കാനാണ് ലക്ഷ്യമിടുന്നത്.
സംസ്ഥാനത്ത് ഒഴിഞ്ഞു കിടക്കുന്ന നിരവധി വീടുകൾ സംരംഭങ്ങൾ തുടങ്ങാൻ ആഗ്രഹിക്കുന്നവർക്ക് വലിയ മുതൽമുടക്കില്ലാതെ പ്രയോജനപ്പെടുത്താമെന്നതാണ് പദ്ധതിയുടെ പ്രധാന ആകർഷണം. ഇതിലൂടെ സ്ഥല സൗകര്യം ഒരു വെല്ലുവിളിയാകുന്ന ചെറുകിട സംരംഭകർക്ക് വലിയ ആശ്വാസമാകും. വ്യവസായ സൗഹൃദ അന്തരീക്ഷം മെച്ചപ്പെടുത്തുന്നതിനും, ഗ്രാമീണ മേഖലയിൽ കൂടുതൽ തൊഴിലവസരങ്ങൾ സൃഷ്ടിക്കുന്നതിനും ഈ പദ്ധതി സഹായകമാകും എന്ന് വ്യവസായ വകുപ്പ് മന്ത്രി അറിയിച്ചു.
ഒഴിഞ്ഞു കിടക്കുന്ന വീട്ടിന്റെ ഉടമകളെയും സംരംഭകരെയും ബന്ധിപ്പിക്കുന്ന ഒരു ഓൺലൈൻ പോർട്ടൽ വഴിയായിരിക്കും പദ്ധതി നടപ്പാക്കുക. വാടക നിരക്കുകൾ, അടിസ്ഥാന സൗകര്യങ്ങൾ എന്നിവ സംബന്ധിച്ച വിവരങ്ങൾ പോർട്ടലിൽ ലഭ്യമാക്കും. ‘മിഷൻ 10000’ പദ്ധതിയുടെ വിശദമായ മാർഗ്ഗനിർദ്ദേശങ്ങളും അപേക്ഷാ രീതികളും ഒരാഴ്ചക്കുള്ളിൽ പ്രഖ്യാപിക്കുമെന്നും, ഇത് കേരളത്തിലെ ചെറുകിട വ്യവസായ മേഖലയിൽ ഒരു കുതിച്ചുചാട്ടം സൃഷ്ടിക്കുമെന്നും അധികൃതർ കൂട്ടിച്ചേർത്തു.
