ലോകത്തെ ഏറ്റവും വലിയ ടെക് ഭീമനായ ഗൂഗിൾ ഇന്ന് 27-ാം പിറന്നാൾ ആഘോഷിക്കുന്നു. 1998 സെപ്റ്റംബർ 27-ന് ഒരു സാധാരണ സെർച്ച് എഞ്ചിനായി തുടക്കം കുറിച്ച ഈ കമ്പനി, കഴിഞ്ഞ 27 വർഷം കൊണ്ട് ലോക വിവരങ്ങളുടെ കേന്ദ്രമായി മാറി. ലാരി പേജും സെർജി ബ്രിന്നും ചേർന്ന് സ്റ്റാൻഫോർഡ് യൂണിവേഴ്സിറ്റിയിൽ തുടങ്ങിയ ഈ സംരംഭം, ഇന്ന് ഇന്റർനെറ്റ് ലോകത്തിന്റെ പര്യായമായി മാറിക്കഴിഞ്ഞു. ഇന്ന് നമ്മുടെ നിത്യജീവിതത്തിലെ ഒരവിഭാജ്യ ഘടകമാണ് ഗൂഗിൾ. ഒരു ചോദ്യത്തിന് ഉത്തരം തേടുന്നതിനും, വഴി കണ്ടെത്തുന്നതിനും, ഇമെയിൽ അയക്കുന്നതിനും, വിനോദത്തിനുമായി കോടിക്കണക്കിന് ആളുകളാണ് ഗൂഗിളിൻ്റെ സേവനങ്ങൾ ഉപയോഗിക്കുന്നത്.
ഗവേഷണത്തിലൂടെയും പുതിയ കണ്ടുപിടുത്തങ്ങളിലൂടെയുമാണ് ഗൂഗിൾ ഈ വളർച്ച നേടിയത്. വെറും സെർച്ച് എഞ്ചിനിൽ നിന്ന് ആൻഡ്രോയിഡ് ഓപ്പറേറ്റിംഗ് സിസ്റ്റം, യൂട്യൂബ്, ജിമെയിൽ, ഗൂഗിൾ മാപ്സ് തുടങ്ങിയ ജനപ്രിയ സേവനങ്ങളിലേക്ക് ഗൂഗിൾ അതിൻ്റെ സാമ്രാജ്യം വികസിപ്പിച്ചു. ഓരോ വർഷവും പുതിയ സാങ്കേതിക വിദ്യകൾ അവതരിപ്പിച്ച് ലോകത്തെ അമ്പരപ്പിക്കാൻ ഗൂഗിളിന് കഴിഞ്ഞിട്ടുണ്ട്. ആർട്ടിഫിഷ്യൽ ഇൻ്റലിജൻസ് (AI), ക്ലൗഡ് കമ്പ്യൂട്ടിംഗ് തുടങ്ങിയ നൂതന മേഖലകളിലെ ഗൂഗിളിൻ്റെ മുന്നേറ്റം ടെക് ലോകത്തിൻ്റെ ഭാവി നിർണ്ണയിക്കുന്നതിൽ പ്രധാന പങ്കുവഹിക്കുന്നു.
തങ്ങളുടെ പിറന്നാൾ ദിനത്തിൽ ഗൂഗിൾ എപ്പോഴും പ്രത്യേക ഡൂഡിലുകൾ ഹോം പേജിൽ അവതരിപ്പിക്കാറുണ്ട്. ഇത്തവണയും പഴയ ലോഗോകൾ ഉൾപ്പെടുത്തി നൊസ്റ്റാൾജിയ ഉണർത്തുന്ന മനോഹരമായ ഡൂഡിലാണ് ഗൂഗിൾ ഒരുക്കിയിട്ടുള്ളത്. ഗ്യാരേജിൽ നിന്ന് ആരംഭിച്ച് ഇന്ന് ലോകത്തെ ഏറ്റവും സ്വാധീനമുള്ള കമ്പനിയായി മാറിയ ഗൂഗിൾ, വരും വർഷങ്ങളിലും പുതിയ തലങ്ങളിലേക്ക് വളരുമെന്ന് ടെക് വിദഗ്ധർ പ്രതീക്ഷിക്കുന്നു. ഈ ആഘോഷ വേളയിൽ ലോകമെമ്പാടുമുള്ള സാങ്കേതിക പ്രേമികൾ ഗൂഗിളിന് ആശംസകൾ നേരുന്നു.
