കൊച്ചി: മലയാള സിനിമയിൽ ഏറെ ചർച്ച ചെയ്യപ്പെട്ട ‘ദൃശ്യം’ ഫ്രാഞ്ചൈസിയുടെ മൂന്നാം ഭാഗമായ ‘ദൃശ്യം 3’-ൻ്റെ ഷൂട്ടിംഗ് ആരംഭിച്ചു. സംവിധായകൻ ജീത്തു ജോസഫ് തന്നെയാണ് ഈ വിവരം അറിയിച്ചത്. ചിത്രത്തെക്കുറിച്ച് പ്രേക്ഷകർക്ക് വലിയ പ്രതീക്ഷകൾ ഉണ്ടെങ്കിലും, മുൻ ചിത്രങ്ങളിൽ നിന്നും വ്യത്യസ്തമായ ഒരു അനുഭവമായിരിക്കും ദൃശ്യം 3 നൽകുകയെന്നും, അമിത പ്രതീക്ഷകൾ വേണ്ടെന്നും അദ്ദേഹം പറഞ്ഞു.
ദൃശ്യം, ദൃശ്യം 2 എന്നീ ചിത്രങ്ങൾ ഗംഭീരമായ ത്രില്ലറുകളായിരുന്നെന്ന് അദ്ദേഹം സമ്മതിക്കുന്നു. എന്നാൽ മൂന്നാം ഭാഗം ആ ഗണത്തിൽ പെടുന്നില്ലെന്നാണ് അദ്ദേഹം നൽകുന്ന സൂചന. ചിത്രത്തിൽ ജോർജ്ജുകുട്ടിയുടെയും കുടുംബത്തിൻ്റെയും ജീവിതത്തിലെ പുതിയ ഘട്ടങ്ങളിലൂടെയാണ് കഥ സഞ്ചരിക്കുന്നത്. ആദ്യ രണ്ട് ഭാഗങ്ങളിലെ പോലെ സസ്പെൻസും ആകാംഷയും നിറഞ്ഞ രംഗങ്ങൾ പ്രതീക്ഷിക്കരുതെന്നും, ഒരു സാധാരണ കഥാപാശ്ചാത്തലത്തിൽ ഒരുക്കുന്ന ചിത്രമായിരിക്കും ഇതെന്നും ജീത്തു ജോസഫ് വ്യക്തമാക്കി.
മോഹൻലാൽ തന്നെയാണ് ജോർജ്ജുകുട്ടി എന്ന കേന്ദ്ര കഥാപാത്രത്തെ അവതരിപ്പിക്കുന്നത്. ആദ്യ രണ്ട് ഭാഗങ്ങളിലെ മിക്ക അഭിനേതാക്കളും ദൃശ്യം 3-ലും ഉണ്ടാകുമെന്നാണ് പ്രതീക്ഷ. ‘ദൃശ്യം’ പരമ്പരയിലെ അവസാന ചിത്രമായിരിക്കും ഇത്. പ്രേക്ഷകരുടെ ആകാംഷ വർദ്ധിപ്പിക്കുന്നതിനോടൊപ്പം, ചിത്രം ഒരുക്കുന്നതിലെ വെല്ലുവിളികളും അദ്ദേഹം പങ്കുവെച്ചു.
