കൊച്ചി: കുംഭമേളയിലെ വൈറൽ ചിത്രങ്ങളിലൂടെ സമൂഹ മാധ്യമങ്ങളിൽ തരംഗമായി മാറിയ മോണലിസ ഭോസലെ മലയാള സിനിമയിൽ അരങ്ങേറ്റം കുറിക്കുന്നു. ‘നാഗമ്മ’ എന്ന് പേരിട്ടിരിക്കുന്ന ചിത്രത്തിലാണ് നടി അഭിനയിക്കുന്നത്. നടൻ കൈലാഷാണ് ചിത്രത്തിലെ നായകൻ. പി. ബിനു വർഗ്ഗീസ് സംവിധാനം ചെയ്യുന്ന ഈ ചിത്രം മോണലിസയുടെ സിനിമാ ജീവിതത്തിലെ ഒരു വലിയ ചുവടുവെപ്പാണ്.
ഇൻഡോർ സ്വദേശിനിയായ മോണലിസ ഉത്തർപ്രദേശിലെ പ്രയാഗ്\u200cരാജിൽ നടന്ന മഹാകുംഭമേളയ്ക്കിടെയാണ് ശ്രദ്ധ നേടുന്നത്. നദിക്ക് സമീപം പൂക്കൾ വിൽക്കുന്നതിനിടെ ചില ഫോട്ടോഗ്രാഫർമാർ പകർത്തിയ മോണലിസയുടെ ചിത്രങ്ങൾ ഇൻ്റർനെറ്റിൽ വൈറലായി. തുടർന്ന് അവർക്ക് ‘കുംഭമേള ബ്യൂട്ടി’ എന്ന പേര് ലഭിച്ചു. വളരെ സാധാരണക്കാരിയായ ഒരു യുവതിക്ക് അപ്രതീക്ഷിതമായി ലഭിച്ച ഈ പ്രശസ്തി അവരുടെ ജീവിതം മാറ്റിമറിച്ചു. മോഡലിംഗ് രംഗത്തും അവർ സജീവമായി.
തുടർന്ന് ബോളിവുഡ് ചിത്രം ‘ദ് ഡയറി ഓഫ് മണിപ്പൂരി’ൽ നായികയായി അഭിനയിക്കാൻ അവസരം ലഭിച്ചു. അതിന് ശേഷം ‘സാദ്ഗി’ എന്ന മ്യൂസിക് വീഡിയോയിലും മോണലിസ അഭിനയിച്ചു. ഇപ്പോൾ മലയാളത്തിൽ നാഗമ്മ എന്ന ചിത്രത്തിലൂടെ അരങ്ങേറ്റം കുറിക്കുമ്പോൾ വലിയ പ്രതീക്ഷയിലാണ് ആരാധകർ. സിനിമയുടെ പൂജാ ചടങ്ങുകൾ കൊച്ചിയിൽ വെച്ച് നടന്നു. സെപ്റ്റംബർ അവസാനത്തോടെ ചിത്രീകരണം ആരംഭിക്കുമെന്നാണ് റിപ്പോർട്ടുകൾ.
