ഗുരുവായൂർ: ഗുരുവായൂർ ക്ഷേത്രക്കുളത്തിന് സമീപം റീൽസ് ചിത്രീകരിച്ച് സോഷ്യൽ മീഡിയയിൽ പങ്കുവെച്ച സംഭവത്തിൽ സോഷ്യൽ മീഡിയ താരം ജാസ്മിൻ ജാഫറിനെതിരെ പരാതി. ഗുരുവായൂർ ക്ഷേത്രത്തിൻ്റെ പവിത്രതയും ആചാരങ്ങളും ലംഘിച്ചെന്ന് ചൂണ്ടിക്കാട്ടിയാണ് ഭക്തർ ഗുരുവായൂർ ദേവസ്വം അധികൃതർക്ക് പരാതി നൽകിയിരിക്കുന്നത്. ക്ഷേത്രക്കുളത്തിൽ സ്ത്രീകൾക്ക് പ്രവേശനമില്ലാത്ത ഭാഗത്ത് നിന്നുകൊണ്ടാണ് ജാസ്മിൻ ജാഫർ വീഡിയോ ചിത്രീകരിച്ചിരിക്കുന്നത്. ഇത് ഭക്തരുടെ വികാരങ്ങളെ വ്രണപ്പെടുത്തിയെന്ന് പരാതിയിൽ പറയുന്നു.
ഗുരുവായൂർ ക്ഷേത്രപരിസരം പോലെയുള്ള പുണ്യസ്ഥലങ്ങളിൽ ഇത്തരം വീഡിയോ ഷൂട്ടുകൾ നടത്തുന്നത് ക്ഷേത്രാചാരങ്ങൾക്ക് എതിരാണെന്ന് ഭക്തർ ചൂണ്ടിക്കാട്ടുന്നു. വീഡിയോ സോഷ്യൽ മീഡിയയിൽ വ്യാപകമായി പ്രചരിച്ചതോടെയാണ് സംഭവം വിവാദമായത്. വീഡിയോയിൽ ജാസ്മിൻ ജാഫർ ക്ഷേത്രക്കുളത്തിൻ്റെ പടികളിൽ നിന്ന് ചിരിച്ചുകൊണ്ട് റീൽസ് ചെയ്യുന്നത് കാണാം. ക്ഷേത്രത്തിൻ്റെ ആചാരങ്ങളെയും പവിത്രതയെയും മാനിക്കാതെയാണ് ഈ പ്രവൃത്തി ചെയ്തതെന്ന് പലരും അഭിപ്രായപ്പെട്ടു.
സംഭവം ഗുരുതരമായ ആചാരലംഘനമാണെന്നും, ജാസ്മിൻ ജാഫറിനെതിരെ ശക്തമായ നടപടികൾ സ്വീകരിക്കണമെന്നും പരാതിക്കാർ ആവശ്യപ്പെട്ടു. ദേവസ്വം അധികൃതർ ഉടൻ തന്നെ വിഷയത്തിൽ ഇടപെടണമെന്നും, ഇത്തരം പ്രവൃത്തികൾ ആവർത്തിക്കാതിരിക്കാൻ കർശനമായ നിയന്ത്രണങ്ങൾ ഏർപ്പെടുത്തണമെന്നും ഭക്തർ ആവശ്യപ്പെട്ടിട്ടുണ്ട്. പരാതിയുടെ അടിസ്ഥാനത്തിൽ ദേവസ്വം അധികൃതർ വിഷയത്തിൽ അന്വേഷണം ആരംഭിച്ചിട്ടുണ്ട്.
