ലോ കോളേജ് സീലിങ് തകർന്നു വീണു: വൻ ദുരന്തം ഒഴിവായി

തിരുവനന്തപുരം പാറശ്ശാല സി.എസ്.ഐ. ലോ കോളേജിൽ ക്ലാസ് നടന്നുകൊണ്ടിരിക്കുമ്പോൾ മുറിയിലെ സീലിങ് ഭാഗികമായി തകർന്നു വീണു. ഭാഗ്യം കൊണ്ട് വൻ ദുരന്തം ഒഴിവായി. സംഭവസമയത്ത് വിദ്യാർത്ഥികളും അധ്യാപകരും ക്ലാസ് മുറിയിൽ ഉണ്ടായിരുന്നെങ്കിലും ആർക്കും കാര്യമായ പരിക്കുകളില്ല. ചെറിയ ചതവുകളോടെ ചില വിദ്യാർത്ഥികൾ രക്ഷപ്പെട്ടു.
രാവിലെ ക്ലാസ് ആരംഭിച്ചതിന് പിന്നാലെയാണ് സംഭവം നടന്നത്. പെട്ടന്നുണ്ടായ സീലിങ് തകർച്ചയിൽ വിദ്യാർത്ഥികളും അധ്യാപകരും പരിഭ്രാന്തരായി. ഉടൻതന്നെ എല്ലാവരും ക്ലാസ് മുറിയിൽ നിന്ന് പുറത്തേക്കോടി രക്ഷപ്പെട്ടു. കെട്ടിടത്തിന്റെ പഴക്കവും അറ്റകുറ്റപ്പണികളുടെ അഭാവവുമാണ് സീലിങ് തകർച്ചയ്ക്ക് കാരണമെന്നാണ് പ്രാഥമിക നിഗമനം. കോളേജ് അധികൃതർ സ്ഥലത്തെത്തി സ്ഥിതിഗതികൾ വിലയിരുത്തി.
സംഭവത്തെ തുടർന്ന് കോളേജിലെ ക്ലാസുകൾക്ക് താൽക്കാലിക അവധി പ്രഖ്യാപിച്ചിട്ടുണ്ട്. തകർന്ന സീലിങ് പൂർണ്ണമായി നീക്കം ചെയ്യാനും കെട്ടിടത്തിന്റെ സുരക്ഷാ ക്രമീകരണങ്ങൾ പരിശോധിക്കാനും അധികൃതർ നടപടികൾ ആരംഭിച്ചു. വിദ്യാർത്ഥികളുടെ സുരക്ഷ ഉറപ്പാക്കുന്നതുവരെ ക്ലാസുകൾ പുനരാരംഭിക്കില്ലെന്ന് കോളേജ് അധികൃതർ അറിയിച്ചു