കോട്ടയം: കോട്ടയം മെഡിക്കൽ കോളജിൽ കഴിഞ്ഞ ദിവസമുണ്ടായ കെട്ടിട തകർച്ചയിൽ ജീവൻ നഷ്ടമായ ബിന്ദുവിന്റെ കുടുംബത്തിന് 5 ലക്ഷം രൂപയുടെ ധനസഹായം പ്രഖ്യാപിച്ചതായി ചാണ്ടി ഉമ്മൻ എം.എൽ.എ അറിയിച്ചു. സംഭവത്തിൽ വലിയ ദുഃഖവും ഞെട്ടലും പ്രകടിപ്പിച്ച എം.എൽ.എ, അപകടം സംഭവിച്ച സ്ഥലത്ത് സന്ദർശിച്ച ശേഷം സഹായം പ്രഖ്യാപിക്കുകയായിരുന്നു.
അപകടത്തിൽ മരിച്ചു പോയ ബിന്ദുവിന്റെ കുടുംബം അതീവ ദാരിദ്ര്യത്തിലാണെന്ന് അധികൃതർ വ്യക്തമാക്കിയിരുന്നു. ഇപ്പോഴുള്ള സാഹചര്യത്തിൽ അതിജീവിക്കാൻ കുടുംബത്തിന് സർക്കാർതല സഹായം ഉണ്ടാകേണ്ടതുണ്ടെന്ന് ചാണ്ടി ഉമ്മൻ ആവശ്യപ്പെട്ടു. വ്യക്തിപരമായ സഹായത്തിന്റെ ഭാഗമായി ഈ തുക കൈമാറുന്നതായി അദ്ദേഹം അറിയിച്ചു.
കെട്ടിടത്തിന്റെ നില നന്നല്ലെന്ന് മുൻപ് നിരവധി തവണ പരാതികൾ ഉണ്ടായിരുന്നുവെന്നും, അധികൃതർ കൂടുതൽ ശ്രദ്ധ പുലർത്തിയിരുന്നെങ്കിൽ അപകടം ഒഴിവാക്കാമായിരുന്നു എന്നും എം.എൽ.എ വ്യക്തമാക്കി. സംഭവത്തെക്കുറിച്ച് സമഗ്ര അന്വേഷണം നടത്തി കുറ്റക്കാർക്കെതിരെ നടപടിയെടുക്കണമെന്നും അദ്ദേഹം ആവശ്യപ്പെട്ടു.
